ကျွန်တော်နှင့် စာရေးခြင်း ( Henry Aung )

မင်္ဂလာပါ ။ Hive platform တွင် ကျွန်တော် ဘာရေးရေး အမြဲတမ်း အားပေးနေသူ တယောက်ရှိပါသည်။ ထိုသူမှာ ကျွန်တော်ဘာရေးရေး ဖတ်လို့ကောင်းတယ်ဟု အားပေးသလို တခါတရံ ရပ်ကွက်ထဲက အကြောင်း သူသိသမျှ တွေ့ကြုံခဲ့ရသမျှအကြောင်း ရေးကြည့်ပါလားဟု ပြောပြတတ်ပါသည်။ ထိုသူမှာ ကျွန်တော့ အမျိုးသမီး Rose ဖြစ်ပါသည်။

သူကတော့ စာရေးကောင်းသူ တယောက် မဟုတ်သည့်တိုင် စာဖတ်ကောင်းသူ တယောက်ဖြစ်သည်ကတော့ သေချာပါသည်။ မကြာခင် @sanpyagayunar အကောင့်မှ တင်သည့် ဆေးဝါးများ အကြောင်း မိတ်ဆွေတို့ ဖတ်ရပါလိမ့်မည်။ ( ကြိုတင်ကြေညာထားခြင်းသာ )

ကျွန်တော် Steemit တွင်ရှိစဉ်က စာအတော်လေး ရေးဖြစ်ခဲ့ပါသည်။ Steemit အကြောင်း ၊ နည်းပညာများ အကြောင်း ၊ ဗဟုသုတ ရစရာများ ၊ သရော်စာ ၊ ဟာသ ( ခေတ်စမ်း အရေးအသား ) ကိုယ်တွေ့မှတ်တမ်း ( ကျွန်တော်ပြောသော စင်္ကပူ ခန်းဆက် ) စသည်ဖြင့် အတော်များများ ရေးသားခဲ့ပါသည်။

၂၀၁၇ - ၂၀၁၈ ကာလများသည် ကျွန်တော့အတွက် လက်အသွက်ဆုံးကာလများ ဖြစ်ပါသည်။ MSC ၏ အလှူအတန်း ဖြင့် မန္တလေး ရောက်ရသည့် အကြောင်း ( လွမ်းမောဖွယ်ကောင်းသော မန္တလေးညများ ) ဟာသ သရော်စာများ ဖြစ်သည့် ( Myanmar Steemit ကျေးရွာသို့ အလည် သွားသည့် အကြောင်း ) အများဆုံး ရေးဖြစ်သည်ကတော့ Cryptocurrency အကြောင်း ဖြစ်လိမ့်မည်ထင်ပါသည်။

ထိူအချိန်က​တော့ ကျွန်တော်လည်း စင်္ကပူ တွင်ရှိနေသေးချိန် အပူအပင်အနှောင်အဖွဲ့ မရှိသေးချိန်ဖြစ်၍ လက်သွက်ခဲ့သည်ဟုထင်ပါသည်။ ထို့အပြင် ထိုအချိန်က Reward ကလည်း အတော်များများ ရနေသေးသည့်ကာလဆိုတော့ စာရေးရသည်မှာ အင်မတန် အားပါပါသည်။

ကျွန်တော့ အမျိုးသမီးက မေးဘူးပါသည် ကျွန်တော်ရေးသားသော စာများ အဘယ့်ကြောင့် Facebook ပေါ်သို့ မတင်ရသည့် အကြောင်း ။ အမှန်ဆိုရလျင် ကျွန်တော့အနေဖြင့် Steemit / Hive platform ပေါ်တွင် Blogging လုပ်ရင်း အနေသားကျလာသည်နှင့်အမျှ Facebook အား သာမန် အဖြစ်သာ အသုံးပြုဖြစ်လာပါသည်။

ဥပမာ သတင်း / နည်းပညာ / မိမိလိုချင်သော information စသည်ဖြင့် မိမိကသာ Facebook မှ သိလိုသည်များကို ထုတ်ယူလိုပါသည်။ မိမိက သူထံသို့ Data သွင်းလိုခြင်း မရှိတော့ပါ။ ဆိုရလျင် Post တင်လိုခြင်း မရှိတော့ပါ။

မိမိ တို့က Facebook တွင် post တင်လိုက်ခြင်းက Facebook တွင် data ထည့်သွင်းလိုက်ခြင်း ဖြစ်ပါသည်။ Facebook က မိမိတို့ Data များအား အသုံးချကာ စီးပွားရှာနေကြခြင်းကိုသိပြီးနောက် ကျွန်တော့အနေဖြင့် မိမိရေးသားထားသော စာ/ ဆောင်းပါးများအား Facebook ပေါ်သို့ မတင်ဖြစ်တော့ပါ။

Facebook က မိမိတို့အား Like ဟူသော အရာနှင့် Emoji ဟူသော အရာများအားပြန်ပေးကာ နှစ်သိမ့်ပေးပါသည်။ Hive platform က မိမိ၏ လက်ရာများအား ထိန်းသိမ်းထားပေးသလို Voting များက မိမိအတွက် လက်တွေ့ကျသော အားပေးမှုဖြစ်စေပါသည်။ အမှန်ဆိုရလျင် ဇော်ဂျီ နှင့် ယူနီကုဒ် မကွဲခဲ့လျင် ကျွန်တော့ ဆောင်းပါးများအား တစုတစည်းတည်း သိမ်းထားနိုင်မည် ဖြစ်ပါသည်။

ဤနေရာတွင် မိတ်ဆွေအနေဖြင့် မေးစရာရှိလာသည်မှာ Hive platform ကကော မည်မျှခိုင်မာပါသနည်းဟူသော အမေးဖြစ်ပါသည်။ အမှန်ကို ဆိုပါမည် ... ကျွန်တော်လည်း မသိပါ။

သို့သော် သေချာသည် တခုကတော့ ကျွန်တော်တို့သည် Hive platform အား အမှီပြု၍ နေ့စဉ် ပြား ၅၀ ရရ / ပြား ၈၀ ရရ / ရသလောက် ရှာယူနေကြသူများဖြစ်ပါသည်။ အခြားသူငှာများက ဤ Platform တွင် ဒေါ်လာသန်း နှင့်ချီ၍ ရင်းနှီးမြုပ်နှံထားကြသူများ ဖြစ်ပါသည်။

အချုပ် ဆိုရလျင် စာရေးခြင်း အနုပညာတွင် Motivation ကအလွန်ပင် အရေးကြီးပါသည်။ မိမိ ရေးသည့်စာက ဖတ်မည့်သူ တယောက်မျှ မရှိလျင် မည်မျှပင်ကောင်းနေပါစေ ကြာလာလျင် စိတ်ဓါတ်ကျလာမည်သာ ဖြစ်ပါသည်။

ထို့ကြောင့် ဤကဲ့သို့ မဖြစ်စေရန် Community များ သို့ ဝင်ရောက်ထားကြပါရန် အကြံပြုလိုပါသည်။ ယခုနောက်ပိုင်း ဝင်ရောက်လာကြသော လူသစ်များ အနေဖြင့် English အရေးအသား အတော်ကောင်းမွန်သည်ကို တွေ့ရသည်ဖြစ်ရာ မြန်မာစာဖြင့် Post တခု English စာဖြင့် post တခု တင်ခြင်း ဖြင့် Reward များ ပိုမိုရယူ နိုင်ကြပါရန် တိုက်တွန်းလိုက်ရပါသည်။

Henry Aung ( Kachin )

02/10/2021 - Saturday - 17;47 Pm